Hver er að þræða villigötur auðnanna inní tún svefnrofa minna?

A sweeper of sidewalks, I've got to do it my way
I'm too ill-equipped for a mathematician
A shrewd politician, a maker of decisions

Draumar um frekari uppfyllingu drauma þinna, eru einsog tvær stelpur með súkkulaði stykki sem ganga á undan þér upp brekku í þröngum buxum. Ömurlegt aðdráttaraflið ekki einu sinni alvöru, heldur bara... og súkkulaðið ekkert nema umbúðir sem ég hirði upp.

The Breiðholt Invasion, sem ég vil kalla svo, er nokkuð sem ég hef orðið fyrir barðinu á undanfarið. Menningarstigið er komið á þetta plan: Hver er Spaskí? Nei, ég fíla ekki BMW. Slökktu á þessu kjaftæði. Ókei, förum þá millileiðina: settu á Bylgjuna!

Skiljanlega er þorstinn í einn Þorbjörn orðinn gasalegur, mann með viti. Ég hef meira að segja skrifað spurningalista fyrir hann, um hin ýmsu málefni, sem ég vildi fá að heyra hans skoðun á.

Er enn að lesa Graham Greene í vinnunni, en sný mér að mannkynssögu á kvöldin, aðallega forn-Grikkja. Heillandi heimur fornleifanna er, já já. Td þessi saga af nýlendunágrannaborgunum Sýbaris og Krótónu á Ítalíhæl.

Sýbarítar ræktuðu auð sinn vel, er sagt að yfir mestum hluta borgarinnar hafi sóltjald verið dregið, hávaðasömum störfum svo sem tré og járnsmíði var bannað að stunda innan endimarka bæjarins, og flest líkamleg störf voru unnin af þrælum. Sýbarítar lágu í leti, skrautklæddir og átu "sjaldfengið lystimeti." Og "síðan merkir orðið sýbaríti sama sem munaðarseggur."

Nú og svo vildi það til að hið illa og öfundsjúka borgardrullusvað Krótóna tók til ófriðar síns sem mest hún mátti, skattar og tollar voru ma deiluefna. Sagt er að Sýbarítar hafi lagt til orustu með 300 þúsundir manna, en það mun vera allmjög ýkt.

"Ennfremur segir sagan að Krótónar hafi ruglað óvinaliðið með því að leika þau lög sem Sýbarítar höfðu kennt hestum sínum að dansa eftir. Hestarnir tóku til að dansa, Sýbarítar brytjaðir niður og borg þeirra svo kirfilega rænd og brennd að hún hvarf úr sögunni á einum degi. 65 árum síðar reistu Heródótos og aðrir Aþenumenn borgina Þúríi í nánd við hinn forna stað. Fundu þeir þá vart urmul eftir af þeirri borg sem eitt sinn hafði verið auðugust allra Grikklandsborga."

Ég vil ekki trúa öðru en að þetta sé satt.