Hver er að þræða villigötur auðnanna inní tún svefnrofa minna?

"Ætti ég að fara að hitta vin minn

og spyrja hann um orð

sem eru fögur og valda vonbrigðum?"

Uppfyllti í dag [fimmtudag] skápinn minn af SS bókum - hér eru þær allar, loksins. Og ég er innantómur frekar en eitthvað annað. Ein er þó eftir, bæklingur raunar, sem ég hef einungis heyrt um, aldrei séð, enda ekki til á söfnum frekar en hjá mér eða öðrum.

Mér reiknast til að það séu um tvö ár síðan ég keypti nýja bók í safnið - hef hinsvegar fengið fjöldamörg auka eintök, sem ég hef haldið uppá eða þá gefið. Eins reiknast mér til að söfnunin hafi tekið á fimmta ár. Á þessum tíma hefur margt breyst, karlinn komst í meira mæli á varir manna, þær komu allar út í kössum - þó breyttum útgáfum, sem ég hef aðeins rannsakað muninn á - og síðast en ekki síst, þá hefur verið á þeim hækkað töluvert. Aðrir um það. Meginið var ódýrt raunar, þessi og Óregla dýrastar. Tvíritin er töluverð, spái bandi á einhverjar þeirra.

Í heild eru þetta 38 bindi.

Og ég er engu bættari. Og sný mér að öðru.